ВИДЕО: Бразил поразен од Парагвај и би можел да остане без пласман на СП 2026
По осум одиграни натпревари во квалификациите за Светското првенство, бразилската фудбалска репрезентација освои само 10 бодови.
Препорачано
Бразил продолжи со очајните игри во квалификациите за Светското првенство во 2026 година, кое ќе се одржи во САД, Мексико и Канада.
Бразил беше поразен од Парагвај во Асунсион – 1:0, а стрелец на единствениот гол беше 21-годишниот Диего Гомез во 20 минута.
Бразилците во прилично нервозна игра се обидоа да стигнат барем до израмнување, но најуспешната селекција на Мундијалот скоро не создаваше прилики.
Прв се закани Жоао Педро во 54 минута, но шутираше покрај стативата, додека најдобрата шанса ја имаше Винисиус во 73 минута, но домашниот голман Роберто Фернандез одлично го одбрани ударот на првотимецот на Реал Мадрид.
На крајот славеше Парагвај кој се врати во живот и моментално се наоѓа на седмата позиција што на крајот ќе доведе до дополнителни квалификации. Бразилците засега се над линијата, но само со бод повеќе од Парагвај.
Во последниот натпревар од ова коло Венецуела и Уругвај одиграа нерешено 0:0. Инаку, шесте првопласирани селекции од јужноамериканската зона ќе се пласираат на следниот Мундијал, додека седмата во Интерконтиненталниот плејоф.
