Eкипите на Бостон селтикс и Кливленд направија важен чекор кон следната рунда од НБА плејофот, откако ги добија и вторите натпревари од своите серии.

Бостон беше сигурен на домашен терен против Орландо, славејќи со 109-100 и поведе со 2-0 во серијата.  Доминираше Бостон од самиот почеток и не дозволи Орландо во ниту еден моемнт да се врати во игра. Џејлен Браун блескаше со 36 поени и 10 скока, додека кај гостите најдобар беше Паоло Банкеро со 32 поени, 9 скока и 7 асистенции.

Сличен развој на настаните имаше и во Кливленд, каде домаќините ја добија втората четвртина со убедливи 43-27 и на крајот славеа против Мајами хит со 121-112. Донован Мичел беше лидерот на домашниот тим со 30 поени, додека најдобар стрелец на натпреварот беше Тајлер Хиро со 33 поени, но тоа не беше доволно за тимот од Флорида да избегне пораз.

Во единствениот натпревар каде што немаше нова победа на истиот тим, Хјустон рокетс успеа да израмни на 1-1 во серијата против Голден стејт. „Ракетите“ славеа со 109-94, благодарение на одличната игра во втората четвртина, каде што создадоа недостижна предност. Џејлен Грин беше во елемент со 38 поени, а Алперен Шенѓун запиша импресивен дабл-дабл од 17 поени и 16 скока. Стеф Кари со 20 поени беше најефикасен кај „воините“.