Состојбата со користењето на водата во земјава е катастрофална – 62,3 проценти воопшто не е фактурирана, алармира претседателот на Регулаторната комисија за енергетика и водни услуги Марко Бислимоски. Но, осврнувајќи се на водните услуги, во разговорот за „Слободен печат“, Бислимоски укажува и на фактот дека браните соодветно не се одржуваат и дека може да ни се случи тоа што се случи во Либија кога пукнаа браните и кога илјадници луѓе ги загубија своите животи.

– Ние иаме проблем со одржувањето на браните. Таму, јас немам впечаток дека се одржувааат соодветно. И мислам дека таму треба многу повеќе да се инвестира во одржувањето за да не си се случи Либија, да ни испука некоја брана па да се чудиме што не снашло. Сите тие брани, во најголем дел се правени во социјалзмот. Многу им помогнале на граѓаните, но и тие за да помогнат на следните генерации, треба соодветно да ги одржуваат – вели Бислимоски.

Во однос на нефактурираните водни услуги, Бислимоски вели дека е јасно оти јавните претпријатија работат лошо.

– Тоа е како да имате во џеб 100 денари и 62 денари да ги фрлите. Па како е можно тоа! – вели Бислимоски.

Тој вели дека еден голем дел од водата истекува низ пукнати цевки, затоа што не се инвестира, а дел од водата едноставно се дава без да се наплати.

– Регулатрната комисија за енергетика има надлежност во определување на минимална и максимална цена за водата, а потоа во тие рамки, советите на општините оперделуваат некоја конечна цена. И сега таму се води една евтина популизација „демек“ ги штитат домаќинствата, а едно просечно домаќинство во државава троши 10 кубика вода месечно, што значи дека ако се зголеми цената за еден денар, трошокот ќе му се зголеми за 10 денари – вели Бислимоски.