Еден од најискусните фудбалери Бесарт Ибраими останува верен на актуелниот македонски шампион Струга Трим Лум.

Напаѓачот и следната натпреварувачка сезона 2024/2025 ќе го носи дресот на Струга, официјално објавија од клубот.

Во изминатата сезона во Првата македонска лига 37-годишниот Ибраими постигна 15 голови од 29 настапи, или севкупно веќе ја достигна бројката од 200 погодоци во шампионатот.

Стружани предводени од новиот тренер Ќатип Османи ги стартуваа летните подготовки во кои покрај тренинзите ќе се темпира формата и со одигрување на контролни мечеви.

И ова лето клубот ќе игра европски натпревари, можни ривали во првото квалификациско коло од Лигата на шампионите се: Слован Братислава, Лудогорец, ХЈК, Флора, Стеауа, Клаксвикар, Шамрок Роверс, Линколн Ред Импс, ТНС, Пјуник, РФС, Петрокуб, Балкани и Борац Бања Лука.

Од тимот си заминаа Ментор Мазрекај, Ванѓел Згуро, Меџит Незири и Едис Малиќи, а нов голман е Босанецот Филип Дујмовиќ.