Американската пејачка Бебе Реџа, која е со етничко албанско потекло од Македонија, вчера сподели низа објави на својот инстаграм-профил, во кои вели дека вработен на аеродром во Минхен ѝ се заканувал бидејќи зборувала на албански јазик, пренесе „Дејли мејл“.

Видливо вознемирена и расплакана на видеата кои ги објави, Реџа објасни дека не ѝ бил дозволен влез во авион на германската авиокомпанија „Луфтанза“.

„’Луфтанза’, ми се закануваа бидејќи мислев дека обезбедувачот е Албанец. Јас му се обратив на албански јазик и го прашав каде може да купам карта и сега тој ми забрани да летам“, напиша таа.

„Верувам дека овде станува збор за злосторство од омраза само затоа што сум Албанка. Тој не ми го кажа своето име. Тој продолжи психички да ме малтретира, со цел да ми покаже дека е помоќен од мене. Никоја од жените во Луфтанза не стана да ме одбрани или да каже нешто во врска со ситуацијата. Тој не ми го кажа своето име. Но, само што дознав дека работи во ‘ATSG’, компанија за контрола на документи ангажирана од Луфтханза“, продолжи Реџа во своите инстаграм-стории.

„Никогаш во животот не сум била олку емотивно исцрпена. Луѓето од ‘Луфтанза’ ме исконтактираа, но ги замолувам да направат целосна истрага за да дознаат кој е човекот кој ја злоупотреби моќта која му беше дадена. ‘Извини’ нема да биде доволно овој пат“, рече пејачката.

ФОТО | Бебе Реџа се врати во Дебар и порача: „Албанија, Косово, Црна Гора, Македонија, Прешево – сите се мојата Албанија“