Фудбалерите на Барселона денеска го победија Реал Мадрид со резултат од 4:3 во спектакуларното Ел Класико во рамките на 35 коло во Ла Лига.

Барса ја продолжи својата победничка серија против својот најголем ривал оваа сезона, четврта по ред, и сега е на прагот од титулата бидејќи има седум бодови предност на три кола до крајот.

Реал Мадрид водеше со 2:0 по само 14 минути игра благодарение на головите на Килијан Мбапе, прво во петтата минута од пенал, а потоа и по асистенција на Винисиус Жуниор.

Следуваше фантастичен пресврт на Каталонците со четири гола, прво, Ерик Гарсија постигна гол во 19 минута, потоа Ламин Јамал ​​постигна спектакуларен гол за 2:2 во 32 минута, а потоа Рафиња реализираше два гола, во 34 и 45 минута.

Играта продолжи да биде „помирна“, но само до 70 минута кога Мбапе постигна хет-трик по уште една асистенција од Винисиус и ја врати неизвесноста.

Во последната минута, Јамал ​​имаше одличен шут, Рафиња добра шанса, за Барселона не беше досуден пенал. Реал пропушти одлична шанса во 89 минута преку младиот Виктор Муњоз, а потоа Мбапе не успеа да израмни ниту во судиското продолжение. На крајот, Фермин Лопез постигна гол, но тој беше поништен поради играње со рака.