Фудбалерите на Баерн се пласираа во осминафиналето на Лигата на шампионите, откако вечерва во реваншот дома во Минхен ремизираше 1:1 со Селтик. Баерн се пласираше во осминафиналето со победата на првиот натпревар во Глазгов со 2:1.

Шкотскиот претставник поведе со голот на Николас-Герит Кун во 63. минута, а Баерн израмни со голот на Алфонсо Дејвис во четвртата минута од судиското надополнување. Германскиот гигант во осминафиналето ќе игра против Баер Леверкузен или Атлетико Мадрид.

Бенфика се пласираше во осминафиналето откако на домашен терен во Лисабон ремизираше со Монако (3:3). Португалската екипа го доби првиот натпревар на гостински терен со 1:0 против францускиот клуб.

Стрелци на Бенфика беа Керем Актуркоглу во 22. минута, Вангелис Павлидис од пенал во 76. минута и Оркун Кокчу во 84. минута. Головите за Монако ги постигнаа Такуми Минамино во 32. минута, Елисе Бен Сегир во 51. минута и Жорж Иленихена во 81. минута. Бенфика во четвртфиналето ќе игра против Барселона или Ливерпул.

Пласман во осминафиналето обезбеди и Клуб Бриж кој на гостински терен во Бергамо ја совлада Аталанта со 3:1. На првиот натпревар во Бриж, белгискиот тим победи со 2:1. Стрелци за Клуб Бриж беа Хемсдин Талби во третата и 27. и Феран Џутгла во третата минута од прекинот на полувремето. Стрелец на голот за италијанската екипа беше Адемола Лукман во 46. минута. Клуб Бриж во четвртфиналето ќе игра против Лил или Астон Вила.

Ждрепката за осминафиналето во ЛШ е закажана за петок во 12.00 часот во Нион.