Актуелниот градоначалник на Тетово Билал Касами најмногу се занимава со работењето на неговата претходничка Теута Арифи обвинувајќи ја за неколку сфери од нејзиното работење. По три месеци молчење за да му остави простор на новиот градоначалик, поранешната градоначалничка на Тетово Теута Арифи денес говореше во Утрински брифинг.

-Актуелниот градоначалник продолжи да води предизборна кампања иако е веќе градоначалник. Жал ми е што поради фактот што не може и не знае да се носи со проблемите на градот кои реално се големи, тој се занимава со мене. Што се однесува до обвинувањето дека имало 800 луѓе вработени со договори на дело, секако дека нема такви. Направени се исплати на луѓе во различни комисии но не станува збор за вработувања, туку за завршени ангажани за општината. Не е коректно да се влечат попусто имињата на луѓето во јавноста, вели  Арифи за Утрински брифинг.

Таа додава дека општината Тетово ја затекнала задолжена и сите години работела со тој долг и го менаџирала и не дебатирала за тоа како настанал тој долг оти граѓаните тоа не ги интересира туку ги интересира функционирањето на градот.

-Поради неспособноста да даде резултати се занимава со мене. Негова најголема заслуга во овие три месеци е укинувањето на велосипедските патики. Да укинете 6 километри велосипедски патеки во презагаден град не е добар потег. Второ достигнување му е замирање на штотуку започнатиот јавен превоз, а трето достигнување е поскапување на паркингот за кој во кампањата велеше дека ќе биде бесплатен, вели Арифи.

Општина Тетово е голема општина со големи проблеми и комплексни состојби. Арифи вели дека токму затоа одбрала овие три месеци да му остави простор на новиот градоначалник Касами време да постигне нешто. Таа додава дека е очигледно оти намерата со поддршката на Касами за градоначалник била да се смени власта преку нејзино уривање, но бидејќи тоа не се случи, гневот е голем.

Сега се забелжува друга тактика на опозицијата – блокирање на работата на Собранието, со можност да се излезе на улица на протести.

-Власта има мнозинство и сите кризи кои се случија во овие две години предизвикуваат незадоволство кај граѓаните. Но тоа незадоволство не секогаш предизвикува гнев кај граѓаните, но ако бидат изманипулирани и излезат на улиците да ја уриваат власта ќе прекинат процесите на преговори со Бугарија и оттука процесот на евроинтеграции, вели Арифи.

Тезата на опозицијата е дека со освојувањето на многу општини сега треба да ја освојат централната власт за да можат општините да функционираат.

-Не е нужно градоначалниците и централната власт да се од иста политичка страна. Ако вие ги добивате изборите од граѓаните на општината, вие сте должи да се грижите за нивните потреби, а не за своите потреби и потребите на вашата политичка опција, вели Арифи и додава дека градоначалникот треба да лобира и подготвува проектна документација за да добие средства и од странските фондови.

Проследете го целиот разговор во видеото