Првиот полицаец во државата, Панче Тошковски вчера најави дека ќе има нов пристап за сообраќајни прекршоци преку СМС известувања и камери на црни точки.

– Системот „Безбеден град“ кој е платен и поставен пред неколку години, од некоја причина се уште не е ставен во функција, иако знаеме дека работи, откако потрагата по Вања Ѓорчевска се вршеше преку прегледувањето на камерите од овој систем. Употребата на „Безбеден град“ би ја зголемила безбедноста во сообраќајот и би се контролирара брзината на автомобилите, поминувањата на црвено светло, престројувањата и непрописните застанувања и паркирања. Што се однесува до страшната бројка од 19000 регистрирани возачи, кои полицијата ги фатила како возат без возачка дозвола, тука мора да постојат редовни контроли на полицијата. Секој добар познавач на приликите ќе ви каже дека вистинската бројка на возачи без дозвола е веројатно три пати поголема од регистрираната. Сметам дека со овој проблем, како и со возачите кои возат под дејство на алкохол или опијати, би се справиле доколку секој полицаец има лична камера и го сними секој престапник во сообраќајот, со што би се оневозможиле протекциите, кои сите знаеме масовно се случуваат – вели новинарот на Слободен печат, Срѓан Ивановиќ.