Мислам дека цел Балкан, а вклучително и Европа се враќа кон механизмот на масовно воено оспособување на своето население. Војната во Украина има голема улога на катализатор во тој процес, бидејќи покажа дека без масовност не можете да остварите професионална армија и кадровски да пополните една војска. Во тој контекст Србија, а и Хрватска на големо влегуваат во тој процес, а по нив и Црна Гора сега влегува во овој глобален тренд на воено оспособување на населението. Прашање на време е кога и Македонија ќе го врати задолжителното служење воен рок. Ова меѓу другото го истакна воено-безбедносниот аналитичар од Србија, Александар Радиќ при неговото гостување во емисијата „Слободен печат“.

– Македонија нема избор околу тоа дали треба или не да го врати задолжителното служење на воениот рок. Сегашното молчење во јавноста по ова прашање е само одложување на овој процес за задолжителното служење на воениот рок.  Дополнително тука не треба да се наметнува дилемата дали е тоа исплатливо или колку би ја чинело земјата. Несомнено е дека тоа ќе го сторат сите земји од регионот, освен БиХ бидејќи таму има компликувана внатрешно- политичка состојба за која меѓународниот фактор најпрво добро треба да размисли што ќе прави со земјата, па потоа да одлучи дали треба низ јавниот дискурс таму да се наметне прашањето да треба да има задолжителен воен рок или не – вели Радиќ.

Во однос на трката со вооружување која го зафати Балканот вклучително и Македонија за српскиот аналитичар тоа е повеќе билдање на мускули пред соседите од колку реална меѓусебна закана. Според Радиќ моралната подготвеност на една нација да војува е вистинското прашање за кое треба да се дискутира и полемизира.

– Земјите од поранешна Југославија сакаат да се гордеат и фалат со модернизација на своите армии иако повеќето од нив се членки земји на НАТО. Но, неоспорен факт е дека најголемиот дел од нивното вооружување е наследството токму од поранешна Југославија. Поголемиот број на оружјето е она што е сочувано од тоа време и е произведено во 80-тите години и затоа големо прашање кое скренува внимание во регионот е токму модернизацијата на овие армии кое пред се е неопходно. Друг, секако факт е и прилагодувањето на своите вооружени сили кон западните стандарди имајќи предвид дека и Македонија е земја членка на НАТО, па оттаму земјата неопходно е да се приспособи кон интероперативноста на Алијансата – посочува тој.

Српскиот новинар при разговорот во студиото истакна дека засега тешко може да се воочи која од армиите од поранешните југословенски простори доминира на Балканот во сите сегменти во одбраната на својата земја.

-Ние земјите во т.н. српско – хрватското говорно подрачје низ годините имаме опсесивна потреба да ги величие своите армии, прво тоа ни се совпаѓа со менталитетот а второ секогаш сакаме да бидеме пред комшиите во било што вклучувајќи и тоа кој е воено помоќен дали тоа се Србите или Хрватите или некој трет. Но, истовремено треба да се каже дека реалниот потенцијал на армиите не почива на тоа што тие набавиле од оружје туку колку е подготвена нацијата да војува односно да се бори. Моралниот чин можеби е оној одлучувачкиот кој би победил при евентуална безбедносна закана. Па оттаму тешко е да се посочи сега кој е повеќе или помалку подготвена армија да војува, дали е тоа српската армија, хрватската или пак македонската –оцени Радиќ.

Воено безбедносниот аналитичар во разговорот во студиото се осврна и на темите од Блискиот Исток, изборите во САД како и дали ќе се менува надворешно-безбедносната политика на Америка по изборите закажани за крајот на следниот месец.

Повеќе од разговорот со новинарот од „Балканската безбедносна мрежа“ Александар Радиќ можете да го погледнете во видеото погоре.