За одредени процеси во државата кои се во интерес на граѓаните треба сите да имаме став и да преземеме одредена одговорност, апсурдно е постојаното бегање од одговорност на ВМРО-ДПМНЕ, изјави за емисијата „Слободен печат“, директорот на Македонија пат и член на Извршниот одбор на СДСМ, Костадин Ацевски.

Тој го коментираше ставот на ВМРО-ДПМНЕ дека нема да го гласаат Талат Џафери за технички премиер.

„Ним (ВМРО-ДПМНЕ) Талат Џафери не им сметал да го гласаат како министер во одбрана, тогаш не им сметал како политички министер со целосни ингеренции, а сега како технички премиер во една техничка влада која е во мандат за обезбедување фер и демократски избори сега им е проблем. Ова е нон сенс. Тоа е како да земеме еден пример, сакаме да одиме во Европа, се качуваме во колата што оди во Европа, меѓутоа сите ќе седиме позади никој не сака да вози“ рече Ацевски.

Според него таквиот начин на функционирање не води никаде и не завршува добро.

„Кога ќе предложите некои имиња треба да ја потврдите поддршката за тие имиња со гласање во Собрание. Сега ако имаат партиски несогласувања или проблем со пратениците да поддржат некои имиња, тоа треба да го решат внатре во партијата, но да учествувате во нешто и да не преземете одговорност или да не сакате да гласате за техничка влада во која ќе учествувате и ќе имате ингеренции, а да не гласате тоа е апсурд“ заклучи Ацевски.

Целиот разговор со Костадин Ацевски, директор на ЈП Македонија пат погледнете го во продолжение: