Состојбата со пожарот во ловиштето „Јасен“ пред неколку часа се влошила поради силниот ветер кој почна да дува попладнето, соопшти директорот на Дирекцијата за заштита и спасување, Стојанче Ангелов.

„Постепено неговата брзина се зголемуваше, предизвика голема непријатност, пожарот се движеше со исклучително голема брзина, горејќи ги боровите стебла, создавајќи висока температира и густ црн чад, кој удираше на гребенот“, изјави Ангелов.

„Нашата цел беше да го одбраниме гребенот и да не му дозволиме на овој пожар да премине преку гребенот, кон страна на село Брезница или кон скопската страна. Ширењето на пожарот беше спречено благодарение на вработените, раководителите и директорот на „Јасен“ и со поддршка од екипа пожарникари од општина Македонски Брод. Се создаваше голема количина чад, која не задушуваше, едвај дишевме, но не се повлековме и ги сопревме пламените јазици“, рече Ангелов.

Тој информира дека напомош пристигнуваат пожарникари од Скопје, Велес и Куманово, кои ќе бидат распоредени.

„Поддршка добиваме и од вработените во општина Сопиште, кои вршат и дотур на вода, како и други активности. Тука се припадници на ЕБР, кои управуват со пинцгауерите на Дирекцијата. Ќе бидеме засилени со уште пет пинцгауери кои ни помагаат за движење по овој страотно тежок терен“, вели директорот на ДЗС.

ЦУК информираше дека до 18:00 часот на територија на цела држава има регистрирано 20 пожари на отворен простор, од кои седум се активни, еден е под контрола, а 12 се изгаснати.

Покрај „Јасен“, активни пожари има и во општина Студеничани, кај Горно Количани и Драчевица – планински врв Китка, во струшкото село Подгорци, кај прилепското село Беловодица – место викано Ливада и село Лењиште, во општина Долнени, кај селата Стровија и Долгаец, во општина Росоман: село Дебреште и во општина Кичево: село Душегубица.

Под контрола е ставен пожарот во општина Старо Нагоричане, кај село Канарево, каде беше зафатена ниска вегетација.