Француското Министерство за здравство подоцна денеска ќе објави дека во земјата се регистрирани над 350.000 случаи на инфекција со ковид-19 во изминатите 24 часа, изјави министерот за здравство Оливие Веран пред француските парламентарци, јави Франс24.

Досега најголем број случаи се забележани на 5 јануари, кога во Франција се потврдени 332.252 случаи.

Оттогаш, повеќе од 300.000 случаи дневно се потврдени двапати во Франција, во време кога позаразната варијанта омикрон стана доминантна.

– Уште 350.000 нови случаи ќе бидат потврдени во вечерните часови, дури и малку повеќе од тоа. Не сме виделе такви бројки од почетокот на здравствената криза, им се обрати Веран на сенаторите.

Француската Влада сака да спречи невакцинираните лица да посетуваат ресторани и настани во затворени простории од средината на јануари, што во моментов е можно со доказ за прележан коронавирус или негативен тест.

Повеќе од 77 отсто од Французите примиле најмалку две дози од вакцините против Ковид-19, додека над 92 отсто од оние на возраст над 12 години се имунизирани.