Бројни обичаи се поврзани со подготовката на семејниот ручек во пресрет на Велигден, а тоа е времето кога семејството се собира на иста трпеза, па особено е важно сѐ да биде како што треба – празнично.

Велигденската гозба дефинитивно не е целосна без вкусната ритуална погача. Во Македонија постојат многу различни рецепти за велигденска погача, во зависност од регионот во кој се подготвува.

Сепак, постои еден што може да се направи без разлика во кој дел од нашата земја живеете. Тоа е наједноставниот што го правеле нашите баби, а чиј вкус и мирис многумина ги враќа во детството.

Состојки:

– 1 коцка квасец
– 1 лажичка шеќер
– 1 шолја млеко
– 5 шолји брашно
– 3 јајца
– 5 лажици млечен путер
– 2 лажички сол
– 1 белка од јајце
– 1 црвено јајце за во средина на погачата

Подготовка:

Квасецот и шеќерот ставете ги во млако млеко да одстојат. Во меѓувреме, во длабок сад ставете ги брашното и солта, а потоа додајте го и квасецот и замесете средно меко тесто со додавање на млака вода, доколку има потреба.

Во друг сад изматете ги трите јајца и путерот и смесата додадете ја на тестото и повторно добро замесете. Додајте брашно по потреба. Покријте го тестото со чиста крпа и оставте го да нарасне.
Откако ќе нарасне, повторно премесете го тестото и поделете го на три дела. Од секој дел исукајте со рацете долга лента и исплетете плетенка.

Во претходно намрсена тава поставете ја плетенката во круг, а во средина ставете го црвеното јајце. Оставете го тестото повторно да нарасне.

Погачата премачкајте ја со белка и ставете ја да се пече во рерна на 220 степени, околy 30 минути, односно додека не се зацрвени. Проверувајте дали е испечена внатрешноста на погачата со помош на чепкалка. Ако чепкалката е влажна и се лепи, значи потребно е погачата се уште да се пече, но на пониска температура доколку веќе е заруменета одозгора.