Дваесет и петгодишен велешанец заработи кривична пријава откако запалил дива депонија во селото Горно Оризари.

Од ОЈО Велес информираат дека обвинетиот на 21 јули годинава, на дива депонија во селото, со умисла предизвикал пожар, палејќи стари седишта од автомобил.

„Бидејќи местото било обраснато со сува трева, а на депонијата имало и бали суво сено и други предмети, огнот брзо се проширил. Со тоа обвинетиот предизвикал значителна опасност по животот и телото на луѓето и по имотот во околните села. Опасноста да биде предизвикана штета од големи размери со ваквите дејствија на обвинетиот е особено изразена со оглед на алармантната состојба со пожарите во околината на Велес и на територијата на целата држава“ се вели во соопштението на ОЈО.

Надлежниот јавен обвинител до Основниот суд во Велес доставил предлог за определување мерка притвор за обвинетиот, поради опасност од бегство и можност да го повтори делото. Судот го прифатил предлогот.