Првиот глобален филмски настан во 2021 година e 74-тото издание на Канскиот филмски фестивал, кој ќе се одржи под строги безбедносни и здравствени упатства. Американскиот режисер Спајк Ли ќе биде претседател на жирито, додека американската глумица и режисерка Џоди Фостер, ќе ја добие почесната Златна палма. Главните промени што се случуваат за фестивалот оваа година вклучуваат носење на маски за време на сите проекции, кои ќе бидат исполнети со 100% од нивниот капацитет за седење, но и на црвениот тепих, пренесува „Variety“.

Во меѓувреме, гостите ќе треба да одржуваат еден метар меѓусебно растојание во редици, додека „фан-зоната“ пред „Palais“, каде што уметниците генерално застануваат да потпишат автограми пред да ја преминат улицата за да се најдат на црвениот тепих оваа година ќе биде изоставена.

„Избегнувањето долги редици и собири пред и помеѓу проекциите ќе биде клучно, а системот за резервации преку Интернет треба да помогне на тој фронт. Ќе им порачаме на луѓето да ги почитуваат временските ознаки на нивните претходно резервирани билети, и ако не го сторат тоа, ќе треба да се почитува растојание од еден метар и ќе имаме налепници на подот“, вели Франсоа Десрусо, генерален секретар на фестивалот.

Еден клучен елемент на протоколот е тестирање на ковид-19, кое ќе треба да се спроведува на секои 48 часа, освен ако гостите не ги примиле двете дози од вакцината 15 дена пред почетокот на фестивалот, или можат да покажат доказ за имунитет преку позитивен тест за антитела или „PCR“ тест направен во рок од 15 дена и завршен во рок од шест месеци.

Шатор од 300 квадратни метри ќе се користи како лабораторија за тестирање. Тестовите, кои можат да се резервираат преку интернет, ќе бидат бесплатни и за француските и за меѓународните учесници и резултатите ќе бидат достапни во рок од шест часа.

Француската влада донела одлука минатата недела да им овозможи на целосно вакцинираните посетители наведени во „зелената зона“ (од Европа, Австралија, Јужна Кореја, Израел, Јапонија, Либан, Нов Зеланд и Сингапур), кои се сметаат за најбезбедни, слободно да влезат во Франција без ограничување или потреба за тестирање.

„Знаеме дека на крајот, некои акредитирани гости нема да дојдат, или затоа што ќе се откажат, или затоа што условите за влез на територијата ќе бидат комплицирани, така што ќе има помалку посетители на фестивалот и повеќе туристи оваа година, но мешавината од двете ќе му даде на фестивалот прилично убава атмосфера“, рекол Десрусо.