Ракометарите на Вардар продолжуваат со убедливите изданија во плејофот од Суперлигата, откако денеска без поголеми проблеми го совладаа тимот на Бутел со резултат 37:30 и така ја потврдија својата фаворитска улога.

Иако Бутел беше рамноправен противник во воведните минути од натпреварот, при резултат 7:7, вардарци направија серија од четири гола и од тој момент натаму ја преземаа целосната контрола врз натпреварот.

До крајот на првото полувреме, разликата во квалитетот веќе беше очигледна. „Црвено-црните“ се одлепија на осум голови (21:13) и на паузата заминаа со сигурна предност.

Во вториот дел ракометарите на Вардар рутински го одржуваа водството, кое постојано се движеше меѓу седум и девет голови разлика. Бутел немаше сили за вистинска закана и остана само да се обиде да го ублажи поразот.

Дмитро Хориха со седум гола беше најефикасен во редовите на Вардар, додека Дамјан Субашевски на спротивната страна постигна шест.