Во зградата на улицата „Наум Наумовски Борче“ со број 87, од каде што беше киднапирана, па убиена 14-годишната Вања Ѓорчевска, според податоците јавно објавени на сајтот на Агенцијата за катастар на недвижности кои ги разгледа „Слободен печат“, сопственици на дел од становите според имотните листови се на бизнисмени или нивни ќерки (од кои дел се акционери во различни компании), потоа поранешни пратеници, членови на управни одбори во акционерски друштва и жени на возраст од околу 40 години, кои во медиумите претходно биле претставени како купувачи на акции во акционерски друштва.

Ова ја прави возможна теоријата на обвинетиот Велибор Манев, кој тврди дека девојчето е грабнато по грешка, во планиран потфат за изнудување пари од богати стопанственици што имале имот во зградата во близина на Градскиот парк во Скопје. Во зградата живеела и Вања Ѓорчевска, 14-годишна ученичка во основно училиште, убиена два часа откако е киднапирана.

Една година претходно, во близина на Велес била ископана огромна дупка длабока четири метри, во која беше усмртен 74-годишниот Панче Жежовски. Велибор Манев, според неговото сведочење, мислел дека таа дупка (земуница) ќе биде локацијата каде што ќе се чуваат заложниците што ќе бидат киднапирани, додека семејствата да искешираат пари, но излегло дека тоа било дупка во која завршил животот на Жежовски.

– Јас ја копав дупката заедно со Влатко Кешишев. Целта беше да се чуваат грабнатите лица и да се пуштат откако ќе се изврши наплатата. Првично требаше да биде грабнат Панче Жежовски, да биде спуштен внатре врзан со синџир за бетонски столб, да се искористи неговото возило за грабнување на жена од 38 до 40-годишна возраст. Откако ќе се грабне таа, да се направи замена. Панче да се пушти да си замине со колата, а жената да биде чувана додека не се изврши наплата. Дупката беше ископана една година претходно – објаснуваше Манев во неговото сведочење пред Кривичниот суд.

Во неговиот исказ тој прецизираше точни имиња на пензиониран бизнисмен со градежна компанија, но спомена и ќерка на фармацевт, која наводно живеела во зградата, а која била таксана за киднапирање. Мотивот, според Манев бил да се рекетираат пари за партијата „Десна“ каде сите обвинети, освен таткото на Вања, Александар Ѓорчевски –  биле членови.  Снемувало пари во „Десна“, се таложеле долгови, ама се приближувале и избори, па ова според Манев, била причината за киднаперските планови на тогашниот претседател на „Десна“ Љупчо Палевски чие претседателство е сега во мирување.

Станбените единици во зградата од која киднаперите ја изнеле Вања во вреќа,  а кои според јавно достапните податоци од Агенцијата за катастар ги поседуваат лица што се имотни, проминентни и добро етаблирани во бизнисот и политиката, се со поголема квадратура, а најголемиот има речиси 100 квадрати.

За дел од сопствениците медиумите објавувале дека купиле акции. Освен од медиумите, токму Палевски, имал можност да ги знае овие луѓе затоа што неговата фирма „Упа ентерпрајз“ во времето кога тој беше моќен градежен стопанственик, ја има изградено зградата што значи дека му е познат распоредот на сутеренот, просториите, подрумите, становите.

Од партијата синоќа прашаа зошто АНБ не реагирала што дупката била копана една година претходно

Партијата „Десна“ го стави во мирување претседателството и членството на обвинетите за убиствата на Вања Ѓорчевска и Панче Жежовски. Генералниот секретар на партијата, кој се претставува како поранешен припадник на безбедносно-разузнавачката заедница, Зоран Петковски, во синоќешниот директен пренос на јутјуб-каналот на партијата, имплицираше сценарио дека „некои од обвинетите се соработници на АНБ и на МВР“ со цел да се оцрни Палевски во едно, како што рече, „удбашко сценарио“. Но, во текот на судењето, кога сведочеа началниците на полицијата, имплицирано беше дека Влатко Кешишев се плашел да им каже што било со образложение дека токму Палевски добро стоел и имал многу луѓе во полицијата.

– А замислете, дупката викана „рудник“ во Велес, е копана и подготвувана од негова страна заедно со Влатко Кешишев, една година однапред. Една година однапред! Не знам што работеле структурите на МВР и на АНБ цела оваа година. Или пак, некое од лицата кои се обвинети не е нивен соработник? Еве јас гласно зборувам и ги споделувам своите мисли. Нема што да се плашам и мислам дека оваа моја теза држи вода – рече Петковски во синоќешниот директен пренос на јутјуб-каналот на „Десна“.

Партијата се преселила во ново седиште кое повеќе не е во Кисела Вода во Скопје, туку во Куманово.

Четворица од обвинетите за убиствата на Вања Ѓорчевска и Велибор Манев се членови на „Десна“. За Александар Ѓорчевски, таткото на Вања, нема таква индиција ниту изведен доказ. Велибор Манев на вчерашното судење рече дека ниту го видел ниту го познава Ѓорчевски, ниту пак дека го слушнал да разговара со Палевски, а претходно кога го тврдеше спротивното – тој исказ го дал под принуда  полицијата да престане да го тепа.