Естрадниот маг Саша Поповиќ почина вчера, на 70-годишна возраст. Поповиќ речиси една година водел тешка битка со болеста, а последните денови ги поминал на клиниката во Париз. Како што пренесува „Телеграф“ тој се лекувал од рак во една од најдобрите клиники во Европа.

Последните денови ги минал во болница, а кога најблиските пријатели и роднини  дознале дека состојбата му се влошила, ведаш заминале во Франција за да бидат со него.

Инаку, како што дознава „Телеграф“, Поповиќ помалку од една година водел жестока битка со една од најопасните болести на денешницата, ракот на желудникот.

Саша во мај минатата година доживеал незгода со ногата поради која заминал на лекар. При прегледот се пожалил и на болки во стомакот, а по деталната анализа му била соопштена страшната дијагноза.

Од тој момент, Поповиќ направил сè за да излезе победник од борбата со својот најголем непријател, но за жал, не успеа да ја победи болеста.

Според првичните информации погребот ќе се одржи во четврток, а времето и местото дополнително ќе бидат објавени.