Утре ќе се објават 80.000 страници доверливи документи за атентатот врз Кенеди, најави Трамп
Американскиот претседател Доналд Трамп најави дека утре ќе бидат ставени на увид на јавноста 80.000 страници досега доверливи документи за атентатот врз претседателот Џон Ф. Кенеди во 1963 година, откако во кампањата вети декласифицирање на тие документи, пренесе „Индепендент“.
Препорачано
„Утре ги објавуваме сите досиеја за Кенеди. Значи, луѓето чекаа со децении за ова, а јас ги упатив своите луѓе дека мора да бидат објавени утре“, им кажа Трамп на новинарите за време на посетата на центарот „Кенеди“ во Вашингтон.
„Ќе има многу за читање. Не верувам дека нешто ќе менуваме. Кажав: „Само не менувајте, не можеме да менуваме“, додаде тој, најавувајќи дека документите ќе бидат „многу интересни“.
Кога новинарите го прашаа што видел во досиејата, тој одговори: „Јас не правам сижеа, вие самите ќе напишете свое сиже“.
Трамп уште во јануари го потпиша извршниот указ со кој се наредува објавување на документите на сојузната влада кои се однесуваат на убиството на Кенеди, како и на атентатите врз поранешниот јавен обвинител Роберт Ф. Кенеди и активистот за човекови права Мартин Лутер Кинг Помладиот.
Со указот им е наложено на директорката на Националната разузнавачка служба и главната јавна обвинителка во рок од 15 дена да престават план за „целосно објавување на записите кои се однесуваат на атентатот на Џон Ф. Кенеди“.
„Кажав за време на кампањата дека ќе го направам тоа. Јас сум човек од збор“, напомена Трамп. Тој даде исто ветување и за време на својот прв мандат, но на крајот дел од документите останаа тајни поради загриженоста на разузнавачките служби.
Џон Ф. Кенеди остана предмет на интерес со децении откако беше убиен во 1963 година во Далас. За атентатот беше уапсен Ли Харви Освалд, кого два дена подоцна го уби Џек Руби. Улогата на Руби и сомнежите околу вината на Освалд го претворија атентатот во една од најразработуваните теми во теориите на заговор.
Конгресот во 1992 година донесе закон со кој се бара сите преостанатите владини документи за убиството на Кенеди да бидат објавени до октомври 2017, освен ако не претставуваат одреден ризик за националната безбедност или разузнавачките служби. Трамп во својот прв мандат во Белата куќа, како и поранешниот претседател Џо Бајден ја продолжија тајноста на одредени документи.
