За пациентите со карцином уште не е отворена просторијата за прием, односно амбулантата во ГОБ „8 Септември“ чија основна цел е да овозможи да се намали фреквенцијата на пациентите на Клиниката за онкологија. Од Фондот за здравство за „Слободен печат“ велат дека пред една недела се одржал состанок меѓу менаџментот на ФЗОМ и директорот на ГОБ „8 Септември“ доктор Синиша Стојаноски.

Директорот на ЈЗУ ГОБ „8 ми септември” информираше дека веќе се започнати подготовките од страна на болницата за адаптација на просторијата за прием на паценти со карцином. Во тек е изготвување на детална финансиска анализа за оваа намена, со цел болницата да достави до Фондот барање за дополнителни финансиски средства. По добивањето на барањето, тоа ќе се разгледа на седница на Управниот одбор на Фондот и ќе се постапи по барањето, велат од Фондот.

Дисперзијата на онколошките услуги за пациентите е неопходна поради тоа што Клиниката за онкологија во комплексот клиники „Мајка Тереза“ се соочува со голем број на онколошки пациенти и нема доволно кадар. Она кое што го направи новото раководство на Клиниката, директорот Игор Стојковски, беше да формира двосменско работење на дневната болница со цел да се намалат гужвите.

Болните со карцином во државата не се соочуваат само со просторни проблеми, туку недоволен е и медицинскиот кадар. Само 46 специјалисти онколози функционираат на целата територија, бројот на малигни заболувања галопира, а недостасуваат и медицински сестри. На Клиниката за онкологија прашавме дали е извршен прием на медицински сестри на нови работни места, но не добивме одговор.

На владина седница пред околу 3 недели помина одлуката во ГОБ „8 Септември“ да може да се вршат амбулантски консултативни прегледи. Во оваа болница има вработено двајца онколози и, според најавите на министерот за здравство доктор Арбен Таравари, може да се почне со примање на полесна онколошка терапија. Но, за тоа треба план и буџет, кои досега не се реализирани. Од условниот буџет кој Фондот ќе го одобри за ГОБ „8 Септември“ зависи иднината на оваа амбуланта, бидејќи со тие пари треба да се купи терапијата.

– Имаме децентрализација во здравството. Секако, во меѓувреме ќе треба Клиниката за онкологија да има договор со ГОБ „8 Септември“ за ова некако да биде под контрола на Клиничка за онкологија, зборувам за онколошки пациенти. Можам да кажам дека барем за еден месец, одредена терапија ќе почнат да примаат пациенти во „8 Септември“ со што делумно ќе ја растовариме Клиниката за онкологија – рече Таравари пред три недели.

Ни акцелераторот во болницата не работи, а Таравари смета дека барем наредните шест месеци нема да проработи. Министерот најави дека наредниот период ќе се фокусира на болниците во Битола и во Тетово за да види што може да се направи таму во поглед на децентрализацијата. Најголемиот проблем за сите онколошки пациенти е тоа што нивниот број расте, а бројот на лекари е ист, а терапиите се скапи.

Има волја во ГОБ „8 Септември“ да се примаат онколошките пациенти – фалат само уште лекови и пари