Министерот за надворешни работи Бујар Османи денеска на прес-конференција соопшти дека се потребни уште минимум 50 нови вработувања за да се задоволат потребите на ресорното министерство.

Османи информира дека само оваа година се пензионираат 18 вработени од МНР и додаде оти мора да се вработуваат нови луѓе.

На новинарско прашање за вработувањето на Бесмира Ејупи во МНР, Османи, кој со денови не се огласуваше откако ВМРО-ДПМНЕ откри дека таа е вработена во МНР, призна дека годинава од Министерството за политички систем и односи меѓу заедниците се преземени вкупно 13 соработници, вклучувајќи ја Ејупи. Дел од нив, како што рече, се во рамки на таа систематизација од К-5 Програмата, дел преку директна спогодба.

Османи ја одржа прес-конференцијата на истиот ден на кој вицепремиерката за добро владеење, Славица Грковска, рече дека министерот за надворешни работи има обврска да биде транспарентен и да ја информира јавноста дали таа личност е вработена во институцијата, во каква постапка и зошто е токму таа избрана за таа позиција.

„Делумно е точна информацијата, преземена е од Министерството за политички систем и односи меѓу заедниците на позиција соработник во протокол, што е почетна позиција во МНР. Во моментов имаме огласи за 16 нови соработници, кој е во тек. Сите оние кои сакаат да работат во дипломатијата на почетни позиции, имаат можност да аплицираат, рече Османи.

28-годишната Ејупи, инаку телевизиска презентерка, стана позната во јавноста во февруари, кога беше објавено дека таа на затворена владина седница била именувана за генерален конзул во Њујорк, САД. Владата тоа не го демантираше директно, правдајќи се со законската забрана за откривање какви било информации од затворена седница, но Османи тогаш рече дека земјава нема именувано конзул со тоа име. Потоа се дозна за бројните хонорарни ангажмани на Ејупи и нејзината сестра, од повеќе државни и локални институции.

Ејупи деновиве повторно е во фокусот, откако се дозна дека била вработена во МНР, а, како што пишуваше „Слободен печат“, тоа е можен чекор кон нејзиното станување дипломатка по забрзана постапка.

Османи денеска рече дека е неточна информацијата оти Ејупи е советник, за што се потребни од 10 до 15 години во ресорното министерство, со многу положени испити и работно искуство. Министерот не гледа ништо спорно во овој процес.

На новинарско прашање дали ќе реферира за Ејупи пред собраниската Комисија за надворешни работи и оти тоа го побарал претседателот на оваа комисија Антонијо Милошоски, Османи рече дека нема ништо спорно во ова вработување и оти тоа е направено во целосна законска процедура, како што се преземени и сите други, вкупно 16 преземања оваа година во МНР. Тој истакна дека „МНР е отворено за сите државјани на земјава и тие може да аплицираат за работа, на некои позиции со средно, а на други со високо образование“.

Османи посочи дека Ејупи не е ниту конзул, ниту кандидат за конзул, туку помлад соработник, на почетничката позиција во МНР.

На новинарско прашање дали на затворена седница на Влада, Сеад Садиковски, актуелен заменик директор на Агенцијата за стокови резерви е назначен за генерален конзул во Торонто, Османи рече „штом рековте затворена седница, тоа значи дека не можам да коментирам”. Додаде дека за амбасадори се бара агреман, а за конзули се бара егзекватура, исто така од државата домаќин. Соопшти дека додека не се добие егзекватура за кандидатот, не може да се објави името, бидејќи има ризик да се одбие. Тој не сакаше да ги коментира имињата и нивното образование и најави дека навреме граѓаните ќе бидат информирани.

Министерот Османи на прес-конференцијата во МНР рече дека има право со закон да има тројца специјални советници, а има само едно место пополнето, а другите се празни. Османи рече дека во МНР има вработени со договор онолку колку што дозволува Министерството за финансии.

Бесмира Ејупи била и член на Надзорниот одбор на Македонски железници-инфраструктура