Познатиот воз Ориент експрес престанува да сообраќа на потегот од британскиот пристанишен град Фолкстон до Лондон поради зголемените гранични контроли по Брегзит, објави денеска Индипендент, пренесува Политика.рс.

Се наведува дека тоа се случило бидејќи постапката за минување на границата со Франција во градот Кале е премногу тешка. Од туристичката компанија „Ориент експрес“, рекоа дека „зголемената визна и пасошка контрола“ значи дека компанијата ќе мора да го прилагоди работењето следната година.

„Сакаме да избегнеме каков било ризик од пречки во патувањето за нашите гости, доцнење и пропуштени врски и да обезбедиме највисоко ниво на услуга, што е можно побеспрекорно и опуштено“, се вели во соопштението.

Патниците на Ориент експрес претходно можеа да патуваат со луксузни арт-деко вагони од станицата Викторија во Лондон до Фолкстоун пред да се качат на автобус за да преминат во Франција, каде што можеа да се приклучат на возот Белмонд на Кале. Купеата во стариот воз Ориент експрес од 1929 година чинат меѓу 3.530 и 10.100 фунти по лице, а патниците се дотеруваат за вечера навечер, пренесува Танјуг.