Уште седум дена остануваат од кампањата за двојните избори на 8 мај. Партиите калкулираат кој ќе биде победник и кој со кого би коалицирал, некои поставуваат услови, други толкуваат кампањи, трети ветуваат „брда и долини“. Сите со иста цел, да освојат повеќе пратеници и да си обезбедат место во извршната власт.

Откако се поизвесно станува дека ВМРО-ДПМНЕ доколку победи би коалицирале со „Вреди“, денеска ДУИ реагираа дека Влада мора да се формира по принципот „победник со победник“, алудирајќи на тоа дека тие планираат да бидат дел од новата влада – со кој македонски партнер, за сега  е непознато.

Сепак реториката на Бујар Османи, доскорешниот кандидат за претседател оди кон таа насока дека кампањата на ВМРО-ДПМНЕ под слоганот „Твоја Македонија“ била шовинистичка. Тој рече дека Христијан Мицкоски ги вратил спомените на Албанците на едни дамнешни времиња кога биле понижувани и омаловажувани.

„Владата ја гледаме како можност за остварување на овие цели, за разлика од оние кои се подготвени да го загрозат народот и волјата на народот за власт. Сакам да ви кажам една работа; тоа нема да се случи, волјата на народот не може да се наруши ниту денес, ниту било кога. Жалам што дојдовме во ситуација да го вратиме споменот на Југославија кога Белград им рече на албанците, што и да сакате, Рахман Морина ќе ве претставува и Рахман Морина цинично се смееше на волјата на народот“, рече Бујар Османи, ДУИ.

ДУИ го обвинува ВРЕДИ дека е подготвен да влезе во владата со ВМРО-ДПМНЕ без никакви услови. Оттаму пак велат дека се единствени легитимни претставници на Албанците.

„Како единствени натпреварувачи во албанскиот политички кампус и секако победници на овој блок, ние сме и единствените и легитимни претставници на албанците на овие избори. Следствено, ова не принудува да ги претставуваме албанците во идната влада, каде меѓу другото, ќе раководиме со важни институции од секторот за внатрешни работи, кои се одговорни за санкционирање на криминалот и корупцијата, за силно и директно да се борат против криминалот и долгогодишната корупција”, рече Африм Гаши, претседател на Алтернатива, ВРЕДИ.

Од друга страна, албанската опозиција стои на ставот дека доколку формира коалциија со ВМРО-ДПМНЕ, мора да се спроведат уставните измени и другите обврски. Но откако Левица повика на обединување со ВМРО-ДПМНЕ заедно да не ги поддржат уставните иизмени, Изет Меџити рече дека не би сакал Влада во која ќе партиципира Левица.

„Единствено со партијата Левица не би сакале да бидат дел од иста влада затоа што, како што наведе, таа е антиевропски настроена. Другите, кој повеќе кој помалку, се европски настроени. Наш приоритет е европската интеграција“, рече Меџити.

Левица излегоа со „Македонска платформа“ во пет точки која може да тежнее он некакво обединување.

„Партијата која го наметна овој наратив ДПМНЕ сега има едноставен избор, да одбере „Македонска платформа“ со Левица, или некоја од останатите, „Тиранска“ или „Софиска“ платформа со партиите од албанскиот блок, кои предвидуваат внесување на Бугарите во Уставот, но и нови етнички мотивирани уцени кон македонскиот народ“, стои во соопштението.

И во интервју за МИА носителот во ИЕ 3 од ЗНАМ Генерал мајор Павле Арсовски потенцираше дека за евентуална коалиција со ВМРО-ДПМНЕ постизборно ќе бараат потпишување на декларација со која ќе бараат нивните услови да бидат исполнети .

Реториката на СДСМ е веќе позната. По поразот во првиот круг од претседателските избори, тие ја продолжија кампањата велејќи дека почнуваат од нула и веруваат дека ќе им докажат на граѓаните дека тие се единственат опција со која Македонија може да ги исполни сите планови, меѓу кои и членството во ЕУ.