Поранешниот грузиски претседател Михаил Саакашвили денеска беше осуден на дополнителни девет години затвор, откако беше прогласен за виновен за проневера, јави новинската агенција Интерпрес.

Саакашвили, кој беше претседател на земјата од 2004 до 2013 година, беше затворен на шест години поради злоупотреба на власта, откако се врати во Грузија во 2021 година по краткиот престој во странство.

Голем дел од казната ја одлежа во затворска болница.

Грузиската телевизија објави снимка од судницата, каде што владееше тензија за време на читањето на пресудата, при што приврзаниците на Саакашвили го нарекуваа судијата „роб“ на актуелната влада .

Саакашвили дојде на власт со Револуцијата на розите во 2003 година.

Тој ги водеше секојдневните демонстрации во центарот на Тбилиси и набрзо го принуди тогашниот претседател Шеварнадзе да поднесе оставка. Неговите приврзаници не се колебаа да го окупираат грузискиот парламент – и во 2004 година, на изборите каде што тој се кандидираше практично без противници, освои… 96% и стана најмладиот претседател во Европа.

Додека беше на власт, тој ја преориентира Грузија кон Запад и започна амбициозна програма за реформи во јавниот сектор, која имаше брзи резултати во оваа јужнокавкаска земја со 3,7 милиони жители.

Сепак, последните години од неговиот мандат беа обележани со авторитаризам, полициска бруталност и разорна војна со Русија во 2008 година.

Во 2012 година, партијата на Саакашвили, Обединетото национално движење, ја загуби изборната битка од сојузот предводен од бизнисменот милијардер Бидзина Иванишвили, кој до ден денес останува фактички лидер на Грузија.

Откако ја напушти власта, Саакашвили се пресели во Украина, каде накратко беше гувернер на јужниот украински регион Одеса.

Во 2021 година, Саакашвили се врати во Грузија и покрај тоа што беше осуден во отсуство за злоупотреба на власта. Тој беше уапсен и затворен по неговото пристигнување.