Искршени клупи, уништени канти за отпадоци, запалени контејнери, оштетени летниковци, скршени улични светилки, исчкртани информативни табли. Ова е сликата која може да се види на голем број јавни површини во Скопје, независно за која скопска општина станува збор. За жал, дел од скопјани своето слободно време наместо за дружба и прошетка го користат за уништување на урбаната опрема и за работите што се поставени таму за јавно добро и за да ги користат сите генерации.

Последен таков пример беше уништувањето на урбаната опрема во Градскиот парк во Скопје, кад што несовесни граѓани искршиле клупи за седење и искршените делови ги фрлиле во езерцето.

-Изминатиот период бевме сведоци на една неубава слика во Градскиот парк, каде нашите екипи забележаа две оштетени и фрлени клупи во езерцето во паркот, како и една оштетена мобилна тоалетна кабина. Забележителни се оштетувањата и уништувањата и на останатите парковски елементи. Поставените урбани парковски елементи: клупи, корпи за отпадоци, летниковци, улични светилки се тие кон кои се вршат вандализми. Тука би ги напоменале и оштетувањата на поставени споменици и бисти на повеќе локации во градот, како и уништување на засадениот цветен расад и садници низ јавното зеленило – велат од ЈП „Паркови и зеленило“.

Од ова јавно претпријатие објаснуваат и дека несовесните граѓани урбаната опрема најмногу ја уништуваат за време на викендите кога раздвиженоста по парковите и на Водно е најголема.

-Особено за време на викендите каде што посетеноста на градските паркови и парк-шумите Водно и Гази Баба е голема, нашите екипи регистрираат оштетувања на дел од урбаната парковска опрема, а и доста несоодветно одлагање смет и отпадоци – информираат од претпријатието.

Околу тоа колку на годишно ниво го чини претпријатието ваквото несовесно однесување на одредени поединци или групи, од ЈП „Паркови и зеленило“ велат дека секоја година сумата за направената материјална штета е различна.

-Сакаме да истакнеме дека на ова прашање треба да се пристапи покомплексно со системско вклучување на повеќе надлежни институции, во насока на сузбивање на ваквите чести појави. Ние како претпријатие, постојано преку средствата за јавно информирање упатуваме апел и соопштенија за тоа како сите посетители треба да се однесуваат кон јавното зеленило и поставените урбани елементи, нагласувајќи ја потребата од чување и грижа за животната околина – велат оттаму.