Управниот одбор на ЈП „Водовод и канализација” утре ќе одржи итна седница во врска со отказот на претседателот на синдикалната организација во претпријатието Стојанче Кашиковски, по барање на Синдикатот СУТКОЗ при ССМ .

Од ССМ велат дека на седницата ќе се разгледува приговорот поднесен од Кашиковски против незаконското Решение за изрекување на дисциплинска мерка – престанок на работниот однос донесено од в.д директорот Марјанче Митовски.

Управниот одбор во текот на утрешниот ден со почеток во 13 часот ќе одржи итна седница на која ќе се разгледува приговорот поднесен од Стојанче Кашиковски против незаконското Решение за изрекување на дисциплинска мерка – престанок на работниот однос, донесено од в.д директорот Марјанче Митовски –  се вели во соопштението на ССМ.

Според ССМ, Митовски му дал отказ на претседателот на Синдикат спротивно на Законот и Колективниот договор, за период кога тој користел годишен одмор, од кој работникот согласно Уставот не смее да се откаже, кога во претпријатието токму заради ваквиот однос на в.д директорот Митовски се спроведува законската процедура за организирање на штрајк и кога веќе е определен овластен помирувач од страна на Министерството за труд и социјална политика.