Неколку полжави се населиле во поштенско сандаче во Девон, Англија и ја изгрицкале речиси цела пошта која била внатре. Жителите велат дека мекотелите секојдневно се отстрануваат од сандачињата, но тие продолжиле да влегуваат во нив, пренесува Би-Би-Си.

Полжавите „го јадат лепилото што го држи пликот во форма“, велат жителите. Од Кралската пошта се уште нема одговор за овој случај.

Поштарите поставиле знаци на поштенското сандаче уште пред најмалку четири месеци, според фотографијата на Гугл Мапс направена во јули.

Пораката залепена на неа вели: „Иако сте многу добредојдени да продолжите да го користите ова поштенско сандаче, сакавме да напоменеме дека вашето писмо можеби нема да пристигне без некои траги од грицкање околу рабовите“.

Според еден селанец, кој не сакал да биде именуван, надвисната вегетација на ѕидот ги поттикнала полжавите да навлезат во сандачињата. Проблемот опстојувал најмалку една година и не бил дискутиран од локалниот совет, велат тие.

Во Корнвол, жителите на Маразион неодамна откриле дека нивните поштенски сандачиња биле запечатени за да ги задржат напаѓачите надвор.