Уникатен рецепт на Стефанија Несторовска: Зелено бурито
Бурито е традиционално мексиканско јадење, кое се состои од тортилја од пченично брашно полнета со прилози. Вообичаено тортилјата полека се пече или се вари на пареа, да омекне и да може да се витка. Во Мексико најчести прилози се месо и грав, а понекогаш нема други прилози. Во САД, буритото вообичаено вклучува комбинација од состојки какви што се: ориз на мексикански начин (со домат, лук и сл.) или обичен ориз, грав или кашест грав, зелена салата, салса, гвакамоле (сос од авокадо), месо, сирење и павлака, а количината варира. Типичното бурито во американски стил се полни со повеќе состојки од она во мексикански стил.
Препорачано
Благодарение на инвентивната Стефанија Несторовска, која стои зад инстаграм-профилот и блогот snestorovska.com, денеска ви донесуваме уникатен рецепт за славното бурито, но во една сосема поинаква варијанта – зелено бурито.
Состојки:
– 1 тиквичка, средна големина
– 2 јајца
– 1 лажица овесно брашно*
– 1 лажичка сол
– зачини по желба (оригано, копар, бибер…)
** овесното брашно може да го замените со кое било друго брашно. Можеби ќе треба да додадете и повеќе од една лажица, во зависност од текстурата што ќе ја добиете и големината на тиквичката. Почнете со една лажица, па ако има потреба, додавајте постепено.
Подготовка:
Се ренда тиквичката и се става во чиста крпа или газа. Убаво се процедува од водата што ја содржи. Исцедете колку што е можно повеќе вода.
Ренданата тиквичка се додава во длабок сад заедно со сите други состојки и убаво се промешува.
Се загрева нелепливо тавче за палачинки со малку маслиново или масло по желба.
Се додава целата смеса и се израмнува во форма на голема палачинка. Се остава да се пржи 5-6 минути на средно висока температура. Проверете дали убаво е запечена и дали добила златникава боја, па превртете од другата страна.
Ако имате тешкотии во превртување на палачинката, префрлете ја од тава на голема чинија, па превртете ја од другата страна во тавата.
Пржете дополнителни 4 минути.
Додајте преливи и сосови по желба, свиткајте го во ролна буритото и уживајте во овој едноставен, здрав и многу вкусен појадок.
