На платото пред ЦК „Марко Цепенков“ во Прилеп на 8 август, со почеток во 19:30 часот, ќе се одржи Вечер на унгарски танци и песни, на која ќе настапат фолклорниот ансамбл „Ризгетош“ и оркестарот „Фокош“.

Концертот, кој има повеќегодишна традиција, е дел од програмата на Центарот во областа на меѓународната соработка, а се реализира заедно со Здружението на Унгарците „Теледом – Македонија“, Амбсадата на Унгарија во земјава и Министерството за надворешни работи на Унгарија.

Народниот ансамбл од Kishegyes – „Rizgetős“ е основан пред 30 години. Членовите на друштвото се млади, заинтересирани за зачувување на унгарските народни обичаи, култура и народни танци. Во изминатите 30 години со Друштвото работеле најголемите познавачи од Унгарија, благодарејќи на што Друштвото е во постојан развој. Покрај автентичните народни танци, се занимава и со танцов театар. Големо внимание посветуваат на постојан развој и зачленување на нови млaди членови.

Секоја година оркестарот учествува на познатиот војводински фестивал за народни танци „Gyöngyösbokrа“, и по мислењата на стручната фела со години наназад се сметаат за едни од најистакнатите унгарски народни ансамбли од Војводина. Главните кореографи на ансамблот се Паќерек Чаба (Patyerek Csaba) и Јовановиќ Паќерек Река (Jovánovity Patyerek Réka).

Народниот оркестар „Фокош“ (Fokos) е формиран во 2010-та во Бечеј – Војводина. Во 2012 година на фестивалот за млади таленти „Fölszállott a páva“, организиран од Унгарската национална телевизија – „DunaTV“, стасаа до полуфиналето, благодарејќи на што од градот Бечеј се одликувани за ширење на добриот глас за градот. На овој натпревар ја освоиле и посебната награда за најавтентичен оркестар, за што добиле 50-часовно наградно студиско снимање во Будимпешта на свое авторско ЦД.

Потоа имаат објавено уште пет ЦД-носачи. Во 2018-та година оркестарот повторно учествувал на фестивалот „Fölszállott a páva“ и тогаш победил во својата категорија. Досега покрај во Војводина и во Унгарија имаат дадено концерти и во Македонија (во 2020 година настапија и пред прилепската публика), но и во Австрија, Чешка, Германија, Финска, Белгија, Холандија и Велика Британија. Во 2018 и 2019 година гостувале и во САД.