Унгарската влада ја прошири привремената забрана за увоз на украински прехранбени производи со мед, вино, леб, шеќер и низа производи од месо и зеленчук, јавува Радио слободна Европа. Унгарија претходно забрани увоз на украинско жито, што предизвика реакции од Брисел.

Листата на производи кои се забрануваат е објавена во владин указ, откако Будимпешта најави мерка за сопирање на увозот на житарки и неколку други производи.

Во последните денови Полска, Унгарија, Словачка и Бугарија забранија увоз на житарки и други прехранбени производи од Украина, откако падот на цените предизвика протести на локалните земјоделци. Европската комисија порача дека таквите еднострани мерки на членките на ЕУ се неприфатливи.

Откако конфликтот во Украина ги блокираше црноморските пристаништа, големи количества украински житарки, кои се поевтини од оние произведени во ЕУ, завршија во средноевропските земји поради логистичкиот хаос, влијаејќи врз цените и продажбата на локалните земјоделци.