Унгарија ја тужи ЕУ за користење на каматата од замрзнатите руски средства за помош на Украина
Унграрија покрена судска постапка против Европската Унија поради одлуката да користи милијарди евра приходи од замрзнатите руски средства за воена помош на Украина.
Препорачано
Тужбата, поднесена од Будимпешта, официјално беше примена од Судот на Европската Унија на 25 август.
Во центарот на спорот е одлуката на Советот на ЕУ донесена минатата година, со која се доделува воена помош на Украина преку Европскиот мировен фонд (ЕМФ), клучниот одбранбен механизам на Унијата. Со овој потег, спроведен во февруари, 99,7 отсто од каматата заработена од замрзнатите руски средства е наменета за Киев. Ова е износ што се проценува на три до пет милијарди евра годишна поддршка.
Унгарија долго време се смета за најнаклонета влада на Кремљ во рамките на ЕУ и постојано ја блокираше помошта за Украина, санкциите против Русија и преговорите за пристапување на Киев во Унијата. По почетокот на руската инвазија, западните земји имобилизираа околу 300 милијарди долари руски државни средства, од кои приближно две третини се наоѓаат во Европската Унија.
Во тужбата поднесена до Судот на Европската Унија, која подоцна беше препратена до Општиот суд, Будимпешта бара „одлуката… за распределба на износот на мерките за помош за обезбедување воена поддршка на вооружените сили на Украина да биде поништена“. Исто така, се бара „да им се наложи на обвинетите да ги платат трошоците“.
Владата на Виктор Орбан тврди дека ЕПФ го прекршил европското право со игнорирање на неговото вето, со оглед на тоа што Унгарија не е „земја-членка што придонесува“ кон инструментот. Се очекува судскиот процес да трае со години, во кој период финансирањето на Украина би можело да продолжи преку други механизми, како што е Инструментот за Украина, според „Еуроњуз“.
Ова не е прв ваков случај; Во јуни 2024 година, Унгарија поднесе слична тужба со која ја оспори одлуката на ЕПФ да ја поддржи Украина, а таа постапка е сè уште во тек.
Овој правен спор доаѓа во време на зголемени тензии меѓу Киев и Будимпешта. Односите беа дополнително затегнати откако украинските беспилотни летала постојано го погодуваа рускиот нафтовод „Дружба“, што ги снабдува со нафта Унгарија и Словачка.
Од почетокот на руската инвазија во 2022 година, ЕУ и земјите-членки обезбедија речиси 186 милијарди долари финансиска, воена и хуманитарна помош за Украина, вклучувајќи 12,8 милијарди долари преку ЕПФ.
