Унгарија е решена да се заштити себеси и Европа од нелегална миграција и го повикува Брисел да ги прекине своите двојни стандарди по ова прашање, изјави денес унгарскиот министер за надворешни работи Петер Сијарто.

По состанокот на шефовите на дипломатиите од форматот Ц5 на земјите од Централна Европа – Австрија, Чешка, Унгарија, Словачка и Словенија, Сијарто на прес-конференцијата нагласи дека нелегалната миграција е „еден од најсериозните заеднички предизвици со кои се соочува регионот“, пренесува агенцијата МТИ.

„Од 2015 година, Унгарија потроши стотици милијарди форинти за заштита на границите, со што ја заштити не само Унгарија, туку и централна и поширока Европа од потенцијален бран од еден милион нелегални мигранти“, рече тој.

Сијарто рече дека им кажал на своите колеги дека претседателката на Европската комисија, Урсула фон дер Лајен, ја пофалила Полска за изградба на ограда на границата и ветила финансиска помош, додека Унгарија плаќа дневна казна од еден милион евра на Брисел за заштита на надворешната граница на ЕУ.

„Ова е сериозна неправда и груб двоен стандард“, рече Сијарто.

Тој, „во духот на солидарноста на Централна Европа“, ги замоли своите колеги министри да помогнат во решавањето на проблемот.