Средбата меѓу украинскиот претседател Володимир Зеленски и рускиот претседател Владимир Путин е главното прашање на дневен ред за украинската делегација на претстојните преговори со руската страна во Истанбул, јавува државната новинска агенција Укринформ, повикувајќи се на извор од преговарачкиот тим.

„Главната тема на разговорот е можноста за средба меѓу лидерите. За Украина, тоа е најприоритетно прашање, бидејќи веруваме дека токму на таква средба можат да се донесат клучни одлуки за постигнување мир“, изјавил изворот.

Украинската делегација, според истиот извор, е фокусирана и на три дополнителни теми: размена на затвореници и враќање на децата, постигнување целосен и траен прекин на огнот, како и создавање услови за директен дијалог меѓу двајцата претседатели.

„Нашата позиција е конструктивна. Ќе зависи од тоа дали Русија е подготвена да се откаже од ултиматуми и да пристапи со сериозни и конкретни предлози“, додава претставникот.

Пред почетокот на разговорите во Истанбул, украинската делегација имаше средба со турскиот претседател Реџеп Таип Ердоган во Анкара.