Украинскиот министер за одбрана Олексеј Резников ги отфрли новите обвинувања за корупција околу снабдувањето на армијата, откако тамошните медиуми ги осудија армиските униформи купени по „надуени“ цени, пишува Еуроњуз.

Неколку украински медиуми објавија дека Министерството за одбрана кон крајот на 2022 година потпишало договор со турска компанија за набавка на зимски униформи, кои потоа тројно поскапеле.

Украинските новинари утврдиле дека оваа опрема можела да се купи во Турција по цени далеку пониски од оние што ги платило министерството.

Сопственик на турската компанија, наводно, бил Олександр Касаи, внук на Генади Касаи, член на политичката партија на Зеленски.

Министерот за одбрана Резников возврати на овие наводни лажни обвинувања, тврдејќи дека цените одговараат на она што го нудат производителите во Турција.

„Ги повикувам сите да ги третираат информациите покритично и поодговорно бидејќи тие го доведуваат во заблуда општеството“, рече тој на прес-конференција. „Уште полошо, ги доведува во заблуда нашите партнери бидејќи однадвор изгледа како да е катастрофа.

Ова е втор наводен корупциски скандал околу армиските испораки на Киев од почетокот на руската инвазија во февруари 2022 година.

На крајот на јануари, низа високи украински функционери беа отпуштени откако беше објавено дека потпишале договори за храна за војниците на првата линија по грубо надуени цени.

Од почетокот на 2022 година, неколку случаи од висок профил излегле на виделина во Украина, земја во која корупцијата долго време е ендемско зло, смета Еуроњуз.