фото: Павла Кубанова

Украинските фудбалери очекуваат тежок натпревар против Македонија во Прага

На 14 октомври (сабота) од 15.00 часот во Прага, Чешка, ќе се игра натпреварот од квалификациите за пласман на ЕП 2024 помеѓу најдобрите фудбалски репрезентации на Украина и Македонија.

Овој меч и за двете селекции е многу важен, реми не им одговара ниту нам, ниту на Украинците, па така, се очекува еден отворен меч и со амбиции да се дојде до победа со која би останале во игра за едно од местата кои водат на Европското првенство.

Најдобрите украински фудбалери предводени од селекторот Сергеј Ребров се подготвуваат и ја темпираат формата за претстојниот дуел со Македонците.

– Стручниот штаб веќе ни дава до знаење што сака да види од нас на следниот натпревар против Македонија. Има многу интересни, интензивни тренинзи. Македонија е многу силен противник. Тоа го видовме на првиот меч и како одиграа против Италијанците. Станува збор за квалитетен тим со добри играчи, па нè чека тежок натпревар. Потребно е да се приспособуваме на секој натпревар како да е последен, затоа што не може поинаку во репрезентацијата. Сигурен сум дека ќе има многу наши навивачи на трибините и затоа очекуваме добра поддршка – рече украинскиот репрезентативец Олександр Сваток кој игра во одбраната.

ВИДЕО | Ашковски: Очекувам добар натпревар против Украина

Фудбалерот од средниот ред во репрезентацијата на Украина, Георгиј Судаков, вели дека треба да се има сериозен пристап од првите минути на натпреварот и да не се повтори првото полувреме во Скопје кога Македонија водеше со 2:0. На тој дуел Украина во вториот дел по пресврт дојде до победата (2:3).

– По таков камбек, разбирате дека во фудбалот сè е можно. Мора да верувате во своите способности, тогаш сè ќе биде во ред. Македонија е тежок противник и тоа веќе го видовме. Македонците неодамна ремизираа со Италија, па затоа се многу силна репрезентација. Се надеваме дека ќе има повеќе наши навивачи во Прага и поголема поддршка. Ќе го почувствуваме тоа, и ќе биде полесно да се игра отколку на првиот меч. Потребен ни е сериозен пристап од првите минути за да не испадне како на претходната средба со нив – се зборовите на Судаков.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 100 ДЕНАРИ

Видео на денот