Околу 200.000 луѓе останаа заробени во опколениот град Мариупол, откако борбите ги прекинаа напорите за евакуација во текот на викендот, без знаци дека огромните меѓународни санкции ја одвраќаат Москва од нејзината инвазија на Украина, пишува Ројтерс.

Цените на нафтата се искачија на највисоките нивоа од 2008 година во азиската трговија, откако администрацијата на Бајден рече дека истражува забрана за увоз на руска нафта. Русија обезбедува 7% од светската понуда.

Јапонија, која ја брои Русија како нејзин петти најголем снабдувач на сурова нафта, исто така разговара со Соединетите Држави и европските земји за евентуална забрана за увоз на руска нафта, објави во понеделникот јапонски Кјодо Њуз.

Руската инвазија беше осудена ширум светот, принуди повеќе од 1,5 милиони Украинци да избегаат во странство и предизвика опсежни санкции предводени од Западот, чија цел е да ја „осакатат руската економија“.

Повеќето луѓе заробени во пристанишниот град Мариупол спијат под земја за да се спасат од шестдневното гранатирање на руските сили кои ги прекинаа снабдувањата со храна, вода, струја и греење, соопштија украинските власти.

Околу половина од 400.000 луѓе во градот вчера требаше да бидат евакуирани, но тие напори беа прекинати откако пропадна планот за прекин на огнот.

Москва постојано негираше дека нападнала цивилни области и вели дека не планира да ја окупира Украина.

Во телефонскиот разговор со турскиот претседател Реџеп Таип Ердоган, рускиот претседател Владимир Путин рече дека е подготвен за дијалог за прекин на борбите, но само доколку украинските сили престанат да се спротивставуваат и ги прифатат неговите барања, според Кремљ.

Бројот на цивилни жртви од воените дејствија низ Украина откако Москва ја започна својата инвазија на 24 февруари изнесуваше 364, меѓу кои повеќе од 20 деца, соопштија во неделата Обединетите нации, додавајќи дека стотици други се повредени.

Генералштабот на вооружените сили на Украина соопшти дека руските сили „почнале да акумулираат ресурси за упадот во Киев“, по неколкудневниот бавен напредок во нивното главно напредување кон главниот град јужно од Белорусија.