Украина соопшти дека е спремна да го прифати американскиот предлог за првичен 30-дневен прекин на огнот со Русија, во заедничко соопштение објавено по состанокот во Саудиска Арабија, јави „Си-ен-ен“.

Вашингтон од своја страна веднаш ќе продолжи да споделува разузнавачки информации и да дава „безбедносна помош“ за Украина.

Американскиот државен секретар Марко Рубио рече дека „топката е кај Русите“ и тој ќе ја однесе понудата до Москва.

Таа понуда е за целосен прекин на огнот – „да се запре пукањето“, рече Рубио.

„Денес луѓе ќе умрат во оваа војна, тие умираа вчера и – за жал – доколку не дојде до прекин на огнот, ќе умираат утре“, рече Рубио, постојано додавајќи дека американскиот претседател Доналд Трамп сака да ја прекине војната во Украина.

Рубио рече дека се надева оти Русите ќе се согласат со прекинот на огнот, но ако не го сторат тоа, „за жал, ќе знаеме кој е пречката за мир тука“.

Зеленски: На САД е да ја убедат Русија да се согласи на прекин на огнот

Украинскиот претседател Володимир Зеленски му се заблагодари на Доналд Трамп за „конструктивноста на разговорот на нашите тимови“ денеска во Џеда.

Во видео на интернет Зеленски повтори дека украинската позиција е да се прифати денешниот предлог на САД за прекин на огнот на небото, морето и на линијата на фронтот.

Тој рече дека тие ова „го сметаат за позитивно“ и сега „останува на САД“ да ја убедат Русија да се согласи.

Важен дел од денешниот разговор беше американскиот договор за продолжување на размената на разузнавачки информации со Украина, рече Зеленски.

„Украина е подготвена за мир“, рече тој и додаде: „Русија мора да покаже дали е спремна да ја прекине војната или да ја продолжи војната. Време е за целосната вистина. Им благодарам на сите што и помагаат на Украина“.

Развојот во разговорите го коментираше и американскиот претседател Доналд Трамп, кој повтори дека негова намера е да ја запре војната и најави дека повторно ќе го повика Зеленски да ја посети Белата куќа.