Украина во неделата покрена постапка против Русија пред највисокиот суд на Обединетите нации, обвинувајќи ја Москва за планирање геноцид и барајќи од судот да интервенира за да ја запре инвазијата и да и наложи на Русија да плати репарации.

Украина, исто така, бара од Меѓународниот суд на правдата, со седиште во Хаг, да посочи „привремени мерки“ со кои и се наложува на Москва „веднаш да ги прекине воените операции“ започнати во четвртокот.

Украина обвинува дека Русија ја започнала својата инвазија на Украина врз основа на лажни тврдења за акти на геноцид во регионите Луганск и Доњецк во источна Украина и сега планира геноцидни акти во Украина.

Украина „нагласено негира дека се случил геноцид во источните региони“ и вели дека го поднела случајот „за да утврди дека Русија нема законска основа да преземе акција во и против Украина со цел спречување и казнување на каков било наводен геноцид“, соопшти судот.

Наскоро судот ќе закаже рочиште на кое ќе се слушне барањето за привремени мерки.