Се шпекулираше во изминатиот период во странските медиуми, а сега тоа доби потврда од украинската фудбалска федерација. Извршниот одбор на Фудбалската федерација на Украина и официјално испрати апел до светската фудбалска куќа, ФИФА, во кој бара иранската репрезентација да биде спречена да учествува на Светското првенство во Катар.

Причина за ваквата одлука на Украинците се обвинувањата на сметка на иранската влада дека со своите постапки ја поддржуваат руската агресија врз Украина.

Украинците веруваат дека иранските власти ѝ доставуваат оружје на руската армија, со што ги прекршуваат членовите три и четири од Статутот на ФИФА, пренесува „Скај Спортс“.

– Имајќи ги предвид информациите во медиумите во врска со систематската манифестација на кршење на човековите права во Иран, кои ги прекршуваат нормите на ФИФА, вмешаноста на Иран во воената агресија врз Украина, како и резолуцијата на Советот за безбедност 2231 во врска со воведување санкции против Иран, бараме ФИФА да го разгледа исклучувањето на иранската репрезентација од Светското првенство – се вели во соопштението на Фудбалската федерација на Украина.

На 20 дена до почетокот на Мундијалот сега се чека одговор од ФИФА. Иран на СП е во групата „Б“, а противници му се Англија, САД и Велс.