Професорката од Вирџинија, која беше застрелана од нејзиниот шестгодишен ученик, поднела тужба во вредност од 40 милиони долари против службениците во училиштето, со наводна небрежност поради игнорирање на знаците за предупредување, пренесува „Би-Би-Си“.

Во тужбата се тврди дека обвинетите знаеле дека детето „имало историја на случајно насилство“. Абигејл Звернер (25) беше застрелана на 6 јануари во раката и горниот дел од градниот кош и помина две недели во болница.

Наставничката во училиштето четири пати била оперирана. Момчето го донело пиштолот во својот ранец во основното училиште Рихнек во Њупорт Њуз, град со околу 180.000 жители северозападно од Вирџинија Бич.

Откако беше застрелана од неидентификуваното момче, Звернер ги одведе другите ученици на безбедно пред да повика помош за себе.

„Таа е војник, таа е херој“, изјави началникот на полицијата Стив Дру по инцидентот.

Според истражителите, детето го зело огненото оружје на мајка си, кое било купено легално. Оттогаш, одборот гласаше за инсталирање детектори за метал во Рихнек, кој има 550 ученици, како и во секое друго училиште во областа.

Надзорникот бил отпуштен од училишниот одбор, а помошникот директор си поднел оставка, но момчето не е обвинето, ниту пак некој друг. Во тужбата се тврди дека истото момче ја „задавило“ својата воспитувачка во градинка минатата година.

Исто така, се наведува дека момчето би ги бркало другите ученици со појас за да ги камшикува и ги пцуело вработените. Според жалбата, два дена пред да отвори оган врз Звернер додека седела на својата катедра, момчето го зело мобилниот телефон на наставничката и го фрлил на земја. За ова тој добил еднодневна суспензија. Неговото семејство вели дека момчето има „акутен инвалидитет“ и ретко одело на училиште без да присуствува еден од неговите родители.

Во тужбата се вели: „Сите обвинети знаеле дека Џон До подеднакво ги напаѓал учениците и наставниците, а неговата мотивација да повреди била насочена кон секој што ќе му се најде на патот, и во и надвор од училиштето, и не бил ограничен само на наставниците додека бил во училиштето“.

Звернер бара надомест на штета за трајни телесни повреди, физичка болка, ментална болка, изгубена заработка и други штети, се вели во тужбата.

„Мислев дека умрев“, рече Звернер за емисијата „Тудеј“ на „Ен-Би-Си“ во март.

Училишниот одбор на Њупорт Њуз не одговори веднаш на мејловите кои бараат коментар.