Тројца млади кавадарчани го претепале до смрт нивниот сограѓанин ноќеска пред казино во Кавадарци. Министерството за внатрешни работи соопшти дека тројцата се приведени во полициска станица и против нив ќе биде поднесена пријава.

– Денеска во 04:56 часот во ОВР Кавадарци било пријавено дека на заден влез од казино на ул.„Никола Минчев“ во Кавадарци, неколку лица физички нападнале едно лице, кое паднало на земја и на кое му била потребна помош. Полициски службеници од ОВР Кавадарци излегле на местото и констатирале дека се работи за лицето П.Т.(43) од Кавадарци, кај кое и покрај укажаната помош, екипа од Итна медицинска помош во 05:15 часот констатирала смрт.  Набргу потоа, а поради сомнение за инволвираност во настанот, од слобода биле лишени Д.Б.(26), М.Ѓ.(35) и Д.С.(27), сите од Кавадарци – соопшти МВР.

На местото на убиството се врши увид, се проверуваат надзорните камери од казиното. Утрово информацијата за убиството ја потврди раководител на Службената за итна медицинска помош.

Тој објасни дека нападнатиот имал смртоносни повреди на главата и кога лекарите дошле на лице место, човекот веќе бил починат.