Три феминистички активистки, на возраст од 19, 29 и 43 години, беа уапсени од општинската полиција за време на нивната акција на лепење карикатура на Шарб низ улиците на Тулуз, на која е претставен гол задник покрај текстот: „А задникот на Мухамед, дали смееме?”, јави дописникот на МИА.

Со кофи полни со лепак и четки, трите активистки имале амбиција да залепат илјада плакати и „да го преплават центарот на градот Тулуз”, со цел да го искористат своето „право на богохулие”, три дена по обезглавувањето на учител во близина на Париз, кој покажувал карикатури на пророкот Мухамед за време на часот за слобода на изразување.

Прашани од случајни љубопитни минувачи за целта на нивната акција, па дури некои од минувачите биле и агресивни, активистките не реагирале.

– Мораме да одиме брзо затоа што ова станува ризична акција, ние не сме тука за да одржиме прес-конференција, изјави организаторот на акцијата, кој побарал анонимност.

– Еден човек беше масакриран во Франција поради прикажување карикатури, му дофрли таа на еден многу упорен минувач.

Синоќа, речиси половина час по почетокот на нивната акција, тие беа уапсени од полицијата и однесени во полициската станица поради прекршок за „диво лепење на плакати “, особено во заштитен урбан дел на градот. Утрово полицискиот притвор се уште беше во тек.

Шарб е еден од карикатуристите на Шарли Ебдо, кој беше убиен заедно со уште неколку карикатуристи на весникот за време на терористичкиот напад извршен врз сатиричниот неделник на 7 јануари 2015 година

(Извор:МИА)