Властите во американската држава Њу Мексико уапсија маж под обвинение за закана со атентат врз американскиот претседател Џо Бајден, јави Си-Ен-Ен.

Џон Торнтон (39) е обвинет за испраќање пораки со закани дека ќе се справи со сегашниот претседател на САД „за предавство”. Торнтон испраќал закани и до жители надвор од државата.

Заканувачките пораки биле испратени од телефонот на Американецот и вклучувале фотографии од него, објави Федералното биро за истраги. Објави со слична содржина се пронајдени и на профилот на Фејсбук на Торнтон.

Обвинетиот утре ќе биде изведен пред суд. Според телевизијата, Торнтон го привлекол вниманието на безбедносните органи во ноември 2020 година.