Фудбалската репрезентација на Македонија до 15 години забележа нов пораз со 3:0 од соодветната селекција на Хрватска во рамките на втората контролна средба одиграна помеѓу овие две селекции на тренинг центарот „Петар Милошевски“ – Скопје.

Македонија преку Емини во 14. минута прва се закани поголот на Хрватска. Во 27. минута, противникот поведе со 1:0, автогол постигна Аксентиев.

Емини во 42. минута ја имаше најдобрата можност, за Македонија, но неговиот удар заврши покрај голот.

Во продолжението, избраниците на селекторот Илами Исејни преку Стојанов и Селими се заканија по голот на Хрватска, но голманот на гостите и во двете ситуации одлично интервенираше.

Драго Шкерго во 69. минута го зголеми водството на Хрватска, а три минути подоцна Иван Чалета ги постави конечните 3:0.

Македонија У15: Михајло Павлов, Матеја Масев, Лука Спироски, Павел Стојанов, Илија Аксентиев, Виган Таири, Огнен Сивевски, Адриан Велески, Александар Полимац, Медин Емини, Аммар Зенделовски.