Туркиш Ерлајнс закажа и пушти во продажба летови меѓу Истанбул и Охрид за летната сезона 2025 година, откако претходно аплицираше за субвенции од државава, објави порталот „Ексју авијација“.

Летовите ќе започнат на 27 март и ќе сообраќаат четирипати неделно – во понеделник, четврток, петок и недела.

Авиолинијата за поврзување на Охрид и Истанбул е една од шесте нови дестинации најавени по последниот повик за субвенции од Владата. Од Охридскиот аеродром ќе има лет и за Милуз, на тромеѓето меѓу Франција, Германија и Швајцарија, а од скопскиот аеродром кон Барселона, Дубаи, Лион и Штутгарт.

Согласно критериумите, финансиската подршка е во висина од 9 евра по патник во доаѓање за патници превезени до „Меѓународен аеродром Скопје“ и 12 евра по патник во доаѓање за патници превезени до аеродромот „Св. Апостол Павле“– Охрид.