Турција го започна мегапроектот за изградба на космодром во Сомалија, а претседателот на најсиромашната африканска земја, Хасан Шеик Махмуд, вели дека космодромот ќе помогне да се отворат работни места и да се зголеми државниот буџет.

Изградбата на космодромот, според проценките, ќе чини околу 6 милијарди долари. Обединетите Арапски Емирати може да бидат меѓу инвеститорите.

„Јас лично верувам дека важноста од воспоставување локација за лансирање на турските сателити во Сомалија е уште поголема од милијардите долари и можностите што ќе ги донесе овој проект“, изјави сомалискиот претседател.

Турција е една од ретките држави во светот што одржува врски со Сомалија. Во текот на изминатата деценија, Турција го прошири своето влијание во земјата преку соработка во различни области и инфраструктурни проекти. Таа е вклучена и во посредување меѓу владата во главниот град Могадишу и лидерите на полуавтономниот регион Сомалиленд. Турција има и своја воена база во Сомалија, како и право да истражува и експлоатира нафта и гас во територијалните води на земјата, во замена за воена заштита.