Турција: Јули 2025 година најтопол месец во последните 55 години, измерени 50,5 степени
Според извештајот на Турската дирекција за метеорологија, јули 2025 година официјално е забележан како најтопол јули во Турција во последните 55 години, објави денес турското Министерство за животна средина, урбанизам и климатски промени.
Препорачано
Просечната температура во јули оваа година изнесувала 26,9 степени Целзиусови, што претставува зголемување од 1,9 степени во споредба со повеќегодишниот просек, се вели во соопштението.
Во анализата што вклучувала податоци од 220 мерни станици, рекордни температури се измерени на дури 66 локации, пренесува Анадолија.
Во соопштението, особено се нагласува дека во градот Силопи се измерени 50,5 степени, што го собори апсолутниот температурен рекорд за месец јули во Турција.
Меѓу десетте најжешки места во земјата, градот Џизре во покраината Ширнак е на првото место, каде што просечната температура во јули достигнала 49,4 степени.
Претходниот национален рекорд беше 49,5 степени Целзиусови и беше измерен во август 2023 година во западната покраина Ескишехир.
Во Турција, која е под интензивна топлина во последните неколку недели, во јули имаше неколку големи пожари.
Четиринаесет лица ги загубија животите борејќи се со пожари минатиот месец на западот од земјата.
Поради два големи пожари, стотици луѓе беа евакуирани во петокот во северозападната покраина Чанаккале, каде што преминот Дарданели беше затворен за поморски сообраќај.
