Турција одлучи целосно да ги прекине сите трговски и економски врски со Израел и го затвора својот воздушен простор за израелски авиони, изјави денеска турскиот министер за надворешни работи Хакан Фидан.

Како што пишува „Јерусалим пост“, економските последици од овој потег сè уште не се познати, но заобиколувањата поради затворениот воздушен простор би можеле да го зголемат времето на патување на летовите од Израел до земји како Грузија и Азербејџан за речиси два часа.

„Турција веќе објави прекин на економските односи со Израел во минатото, но врските продолжија“, изјави израелски функционер за  „Јерусалим пост“.

Овој потег следува по извештаите дека турските пристанишни власти почнале неформално да бараат од бродските агенти да достават писма со кои се потврдува дека бродовите не се поврзани со Израел и не превезуваат воена или опасна стока наменета за таа земја.

Според извори, пристанишната управа усно им наложила на пристанишните агенти да обезбедат писмени гаранции, но не е издадено официјално писмо во врска со ова. Овој потег е продолжение на мерките на Турција против Израел откако минатата година ја прекина трговијата со земјата, вредна околу 6 милијарди евра годишно, поради војната во Појасот Газа.