Во рамките од петтото коло во Првата македонска фудбалска лига и после репрезентативната пауза, актуелниот шампион Шкендија како противник го има тимот на Башкими. Сепак, овој меч за тетовските „црвено-црни“ ќе биде четврти сезонава, со оглед дека минатиот од четвртото коло беше одложен поради настапите на шампионот во плејофот во Лигата на Европа и натпреварите на нашата селекција до 21 година. Досега тимот има две победи и едно „реми“ во шампионатот.

Десниот бек на Шкендија, Александер Трумчи го најави денешниот натпревар против Башкими кој ќе се игра од 15.30 часот на Градскиот стадион во Тетово:

– Атмосферата во екипата е многу добра. Добро нѝ дојде малиот одмор, бидејќи поминавме еден период со многу згуснат распоред. Добро сме подготвени за натпреварот со Башкими. Го имаме анализирано добро противникот, и можам да кажам дека станува збор за многу сериозна екипа, и ние мораме сериозно да го сфатиме овој натпревар, да излеземе на терен, да дадеме максимум и да ги освоиме трите бода – изјави Трумчи.

Фудбалерот на Шкендија рече дека посакува многу публика, убава атмосфера во Тетово, со присуство на навивачки групи на двата тима.

– Со нетрпение очекуваме да играме пред нашата публика, затоа што ни недостасува на овие натпревари. Ќе го дадеме максимумот на секој меч да го освоиме првото место, што е и наша цел. Очекувам добра атмосфера на стадионот, затоа што и ние и нашиот противник има добри навивачи. Очекувам убав меч, во кој ќе уживаме и ние, и публиката која ќе дојде на стадионот – вели десниот бек на тетовци.